Kengurus
«mint» sta in tudais-ch per matematica, informatica, scienzas natüralas e tecnica. E quai es il revier principal da la SOP a Turich. Perquai sustegna il departamaint da matematica da la scoul’ota politecnica a Turich, l’ETH zürich, cun otras la società chi organisescha daspö divers ons la concurrenza Kenguru da matematica.
La concurrenza vain organisada minch’on dürant il mais marz per uffants e giuventüm, a partir da la terza classa. Illas scoulas primaras rumantschas es l’instrucziun da matematica per rumantsch, in nos cas vallader. Sün dumonda da las scoulas da Zernez e Tarasp, ha la Lia Rumantscha cumanzà a tradüer la documainta per vallader, uossa il terz on. Quist on s’han partecipats eir uffants da la scoula bilingua a Cuoira per vallader e per la prüma vouta vaina eir tradüt in puter pella scoula da La Punt Chamues-ch. Mincha partecipanta e mincha partecipant survain ün certificat chi muossa sia prestaziun ed ün regalin.
Castors
I’l mais mai passà s’haja pudü leger in gazetta cha’l castor, la plü gronda bes-cha ruslignanta da l’Europa, as derasa eir darcheu in Engiadina. Lönch avant co cha quels sun gnüts aint da Fuond a Pradella e dafatta rivats sü Samedan, daiva la concurrenza dal Castor informatic svizzer. In Svizra vain quel realisà da la «ssii», la società svizra per l’informatica ill’instrucziun.
Eir quia as tratta insè dad üna concurrenza internaziunala ed eir quia es la lingua d’instrucziun i’l rom correspundent natüralmaing rumantsch, in scoula primara. La prosm’ediziun sarà in november da quist on. La dumonda per quista sporta nu para intant amo dad esser gronda.
Menta rumantscha
Che ha tuot quist da chefar cun menta? In fuond nöglia. Ma sco magister da lingua am vain adimmaint menta per inglais, sch’eu leg o dod «mint». Quai chi füss ün stincal da lingua tuot bellin, scha la scurznida inglaisa nu füss «stem»: scienza, tecnologia, engeneering e matematica…
Glossari
|
promouver |
fördern |
|
la menta |
die Minze |
|
la concurrenza |
der Wettbewerb |
|
sustegner |
unterstützen |
|
la partecipanta |
die Teilnehmerin |
|
il castor |
der Biber |
|
Fuond (lö) |
Pfunds (Ort) |
|
la scienza |
die Wissenschaft |
|
l'indschegn |
die Geschicklichkeit |
Für mehr romanisches MINT
Das dritte Jahr unterstützt die Lia Rumantscha die Übersetzung des «Känguru der Mathematik» Wettbewerbs, damit auch Schülerinnen und Schüler in der Region Engiadina Bassa / Val Müstair daran teilnehmen können. Das Ziel solcher Wettbewerbe ist es, durch die Aufgaben die Freude am mathematischen Denken und Arbeiten zu wecken und zu unterstützen.
