Daspö il 1920 cumpara la Chasa Paterna on per on. Mincha jada survain üna autura o ün autur la pussibiltà da publichar raquints o poesias per ladin. Quist on ha accumpli Romedi Arquint seis 80avel anniversari. Sia vita es caracterisada d'ün grond ingaschamaint pel rumantsch e pella Rumantschia. Tanter oter es el stat president da la Lia Rumantscha e da l'Uniun dals Grischs. Daspö bundant desch ons as dedichescha Romedi Arquint al scriver: cudeschs, columnas, contribuziuns per RTR. Sia plü nouv'ouvra «Notizchas dal paur da Standet» edischa l'Uniun dals Grischs sco Chasa Paterna Nr. 141, quai eir sco arcugnuschentscha per tuot seis merits a favur da la lingua e cultura ladina.
Üna buna cumbinaziun
Il raquint as basa a notizchas chi vegnan chattadas sün palantschin. L'istorgia es üna sort biografia fictiva davart ün paur solitari da Zernez. Ella vain inromada dad evenimaints chi sun propa capitats in Engiadina ed han muantà la società. Scritta es l'istorgia in vallader, cun parts in dialect da Zernez. Las illustraziuns ha fat Paulin Nuotclà. Il pionier da rock rumantsch es eir cuntschaint per sias illustraziuns e per seis sgrafits. Dal 1976 fin 1989 ha'l publichà ils comics da Baldi chi sun dvantats cult illa regiun. Cullas illustraziuns per «Notizchas dal paur da Standet» dvainta Paulin Nuotclà darcheu activ sco illustratur.
Be pellas lecturas e'ls lecturs dad Allegra daja quia ün pitschen extrat dal raquint:
Sün maisa d’eiran tanter oter palperom eir ün plic da quaderns cun la cuverta brüna sco ch’eu tils cugnuschaiva da meis temp da scoula, tar bap d’eiran quels blovs. Sainza bler dar bada tils n’haja trats our dal mantun da gazettas, broschüras e palperis da reclama. Sülla cuverta dad ün da quels d’eira scrit Menduri Margna, 5avla classa, cun la scrittüra magistrala da Burteldür sco cha nus til nomnaivan. Ma invezza da dictats d’eiran las paginas scrittas cun üna scrittürina chi paraiva sco dad avair temma cha las paginas nu tendschessan per quintar tuot que cha’l scrivant vaiva in petto e prescha da metter sün palperi. I’s trattaiva da scrivandas dals ultims vainch ans, adüna darcheu ün oter datum, fin avant duos ans, als 20 december.
Ah, que es be ün scrivlottöz ch’eu nu riv gnanca da leger, maindir d’incleger – scha tü voust, piglia’l cun tai. Ed uschè sun eu dvantà possessur d’ün s-chazi chi m’es gnü adüna pü adachar. (Romedi Arquint, Il paur da Standet)
La Chasa Paterna as poja cumprar i'l Chesina Manella, online sur udg.ch o lura illas librarias in Engiadina.
