«Per poetinas e fabulunzs!»
Sco mincha duos ons invida la Lia Rumantscha cordialmaing a las poetinas e’ls fabulunzs da las regiuns rumantschas da’s partecipar a la concurrenza da scriver Pledpierla.
A las vendschadras o ils vendschaders spettan – sper lod ed arcugnuschentscha – bels premis e perfin üna prelecziun in occasiun dals Dis da litteratura a Domat. Ma quels texts vegnan tematisats ed eir publichats illa pressa, i’l radio ed i’l Chalender Ladin.
Uffants, giuvenilas e giuvenils da 9 fin 25 ons as pon partecipar cun lur texts scrits in vallader, puter, tuot tschels idioms rumantschs o rumantsch grischun. Las contribuziuns in fuorma dad istorgias, cumponimaints, poesias o raquints pon gnir inoltrats infin la fin da marz 2021. La premiaziun sarà ils 2 da gün 2021 illas trais regiuns rumantschas: i’l Grischun Central, in Surselva ed in Engiadina – Val Müstair. Nouv dimena tuot infra ün on da scoula. In mincha regiun e per mincha categoria vain tschernüda üna vendschadra o ün vendschader.
Las tematicas sun quist on per las classas primaras «Üna bes-cha quinta da sia vita». Pel s-chalin ot da la scoula populara e la giuventüm «Il clima as müda – eu müd il clima». Las scoulas popularas, professiunalas e gimnasialas han tschüf las infuormaziuns l’utuon passà e varan fingià surlavurà ils texts plü co üna jada! Ma tuot la giuventüm nu va plü a scoula… Daplü infuormaziuns as chatta sülla pagina-web da la Lia Rumantscha o eir pro’l promotur regiunal.
Pledpierla daja daspö var 22 ons illas valladas ladinas. Che algordanzas svaglia quista concurrenza pro Vus? Che text o episoda S’es restà in memoria? Vais eir partecipà o dafatta guadagnà? Dat part per e-mail o posta.
Tschüf gust da scriver?
Dà man la penna e dai – amo bundant ün mais temp!
Für den literarischen Nachwuchs
Der Schreibwettbewerb Pledpierla der Lia Rumantscha findet auch diesen Winter wieder statt. Kinder und Jugendliche zwischen 9 und 25 Jahren sind alle herzlich eingeladen, ihre Texte zum gegebenen Thema einzureichen. Die Beiträge dürfen in allen romanischen Idiomen oder in Rumantsch Grischun verfasst werden. Die Siegerin oder der Sieger jeder Kategorie darf ihren Text während den Dis da litteratura in Domat/Ems einem interessierten Publikum präsentieren.
Für weitere Informationen liarumantscha.ch
