Ün regal per mincha uffant nouvnaschü
Quai es il titel dad ün proget, cha la Lia Rumantscha maina daspö l’on passà in buna collavuraziun cullas Uniuns affiliadas, pro nus l’Uniun dals Grischs e cun üna gronda part dals cumüns rumantschs e bilings. Illa regiun Engiadina Bassa / Val Müstair sun quai tuots.
Grazcha al fich bun resun dürant l’on passà e la prontezza dals partenaris da'ns sustegner, pudaina cuntinuar cun quist bel proget.
Id es fich important cha’ls uffants vegnan fingià da pitschen insü in contact culla lingua rumantscha. Uschè ha la Lia Rumantscha creà quist «regal per mincha uffant nouvnaschü». Il regal cuntegna ün cudesch rumantsch, pro nus in vallader, üna cartulina da gratulaziun pels genituors ed ün fögliet cun infuormaziuns sur da las diversas sportas per famiglias da la Lia Rumantscha. Uschè vaina pudü, insembel culs partenaris, far var 300 regals a nouvnaschüts.
In quist lö ün schlass grazcha fich pellas cartulinas cha nus vain surgni da genituors!
Per uffants vivs …
… vivais-chs, vis-chels, svagliats, aisels, be vita, sco sajettölas, vivs sco la puolvra o per listess dir uschea: per kidsfits. Na, kidsfits nun es simplamaing ün surnom per Luisa e Nic da la famiglia Babulin. Eir scha’l success da La famiglia Babulin dà schlantsch e fa plaschair.
Sülla pagina-web dal program da famiglias chattais la sporta da la Lia Rumantscha per famiglias, gruppas da gö, genituors da di, canortas e scoulinas – schi per vallader e cun material didactic. Lessat svagliar vos plaschair ed il plaschair dals uffants da discuorrer rumantsch? Tscherchais versins, gös, cudeschs infuormaziuns davart lingua e bilinguità? kidsfits es quia per uffants vivs chi han plaschair da la lingua rumantscha e fan adöver da quella – e per quels chi fan quai jent cun els!
Ordinaturs tematics, sets da maisa, ün chalender special da la famiglia Babulin, cudeschs auditivs e bler oter plü as chatta sün quista pagina-web. Ed in nossa butia online sün liarumantscha.ch amo bler daplü.
Für romanische Familien …
… und diejenigen, die es noch werden wollen, hat die Lia Rumantscha, zusammen mit den territorialen Vereinigungen und den rätoromanischen und zweisprachigen Gemeinden, allen Neugeborenen ein Geschenk überreicht. Das Projekt ist im Jahr 2023 auch in der Region Engiadina Bassa / Val Müstair angelaufen und besteht aus einem Buch auf Vallader, einer Glückwunschkarte und Informationen zum Angebot der Lia Rumantscha für Familien.
kidsfits ist das Familienprogramm für fitte Kinder – fit und neugierig bezüglich Rätoromanisch. Auf der zugehörigen Website finden sich thematische Ordner, Spiele, Tischsets, ein Kalender mit speziellen Tagen über das Jahr mit Bastelideen, Knobelspielen und vieles mehr. Einfach mal aus purer Neugierde besuchen und sich animieren lassen!
