La sporta «cuors rumantschs» da la Lia Rumantscha
Ün cordial «grazcha fich», ün barat spontan cun indigens o ün pêr pleds vallader i'l cafè – precis quists inscunters fan gnir las vacanzas inschmanchablas. Chi chi discuorra la lingua regiunala sfuondra plü profuondamaing illa cultura e resainta la destinaziun in ün möd special ed autentic.
Saja quai online o al lö, in gruppa o ill’ instrucziun privata - noss cuors da lingua sun l'entrada i’l rumantsch, simpel e dastrusch al minchadi. Els as drizzan a giasts da vacanzas, proprietaris da seguondas abitaziuns ed a tuot quels chi lessan approfundir lur affecziun cun la regiun.
Cumplettada vain la sporta dürant la stà culs cuors da rumantsch da vacanzas, resp. cuors intensivs a Scuol e l’utuon in Val Müstair. Uschè guadognan las partecipantas ed il partecipants svelt sgürezza i'l ir intuorn culla lingua e han inscunters cun indigens amo plü persunals.
L'attachamaint culla regiun as lascha eir dar inavant a la prosma generaziun:
Culla sporta online «Rumantsch a distanza» pon scolaras e scolars da tuot la Svizra – forsa uffants o abiadis da giasts da vacanzas e da seguondas abitaziuns – s'approfundir illa quarta lingua naziunala.
Cuors standard / da la saira
Cuors da vallader daja al lö singuls a Scuol ed in collavuraziun culla Biosfera Val Müstair. Per pudair spordscher daplü, mancan manadras e manaders chi sun eir dürant l’eivna in val.
Oters formats da cuors
Daspö il 2022 spordscha la Lia Rumantscha eir Cuors specials. Quels düran üna sonda ed as drizzan a partecipantas e partecipants chi frequaintan uschigliö ils cuors online. L’utuon 2025 e la stà 2026 ha la Lia Rumantscha sustgnü l’organisaziun da la seguonda e terza Fin d’eivna rumantscha i’ls Cumüns alpinists Lavin-Guarda-Ardez. Amenduos formats da cuors han success e vegnan organisats inavant.
Cuors cumpacts
Sper ils cuors intensivs ed ils cuors generals da lingua spordscha la Lia Rumantscha eir cuors cumpacts da lingua e cultura per gruppas da creschüts e per classas da scoula da la Bassa. L’on 2025 vaina pudü preschantar 9 jadas la lingua e cultura rumantscha a passa 115 persunas in tuot l‘Engiadina.
La lingua collia umans. Forsa cumainza vos prossem inscunter in Engiadina cun ün simpel «Bun di».
Ulteriuras infuormaziuns e termins da cuors actuals sün: curs.ch
