CIRs
Adüna darcheu bellas scurznidas, nun? Ils Cuors Intensivs da Rumantsch da stà a Scuol. E Petrus ha muossà, cha quels til stan a cour! I d’eira cun distanza la plü bell’eivna dal quist lügl. Ma na be perquai nun esa stat ün success.
La grondischma part da las partecipantas e dals partecipants d’eiran fich cuntaintas e cussaglian ils cuors intensivs. Eir il cusglier federal Ignazio Cassis ha zuond lodà quista sort cuors! El s’ha partecipà, insembel cun sia duonna, a las lecziuns dal lündeschdi avantmezdi.
In tuot han per finir üna tschientina persunas imprais intensivamaing vallader dürant ün’eivna a Scuol. Quai sun bain ün quart damain sco avant duos ons, sainza pandemia, ma amo adüna ün quart daplü co avant gnanca uschè bler plü lönch. E quai adonta dal fat, cha nus vain pretais ün certificat, per pudair lura realisar ils cuors sainz’oblig da mascrinas – in stanza ed in chasa da scoula.
Sainza la magistraglia ingaschada nu füss il rebomb sgüra neir stat uschè positiv. Ellas/Els nu n’han quist on «be» instrui quels tschinch avantmezdis. Na, üna buna part ha eir güdà a realisar il program accumpagnant, uschè cha nus til vain tuottüna pudü spordscher. Cun guidas tras Scuol Sot e Sura, cun seis bügls dad aua forta. Ma eir cun preschantaziuns litteraras, da las poesias da Madlaina Stuppan a prosa dals Bardolas. O lura cun occasiuns supplementaras da conversaziun ma eir cun ün davomezdi da gös. Quist on be per partecipantas e partecipants.
CIRu
La finischun dals CIRs a Scuol es fingià tard pel principi dals Cuors Intensivs da Rumantsch d’utuon in Val Müstair. Quels sun previs dals 11 als 15 d’october a Sta Maria. Eir qua in chasa da scoula. Cun publicaziun da l’ALLEGRA restan amo ün pêr dis per s’annunzchar, schi’d ha amo plazza illas classas. Perche cha uossa, mità d’avuost vaina var 40 annunzchas. Pensond vi da la quantità maximala da partecipantas, sun quai fingià duos terzs. I resta be da sperar, chi saja lura amo pussibel da realisar cun tuot quistas uondas. Cun program accumpagnant, chant, posas cumünaivlas e pipapo, ma sainza hotspot.
Ed il rest da l’on?
Spordscha la LR eir cuors da vallader. Uossa in settember cumainzan darcheu ils cuors da la saira in differents lös da nossa regiun. Schi dà üna dumonda, provaina da realisar correspundentamaing. Üna difficultà chi tuorna a gnir es la tschercha da magistraglia. Pels cuors sün distanza esa main greiv da chattar. E hai – quist es eir ün appel – a cas.
Linard Martinelli, promotur regiunal Lia Rumantscha
Ferienintensivkurse im Herbst
Das Interesse ist, trotz der allgemeinen Verunsicherung, nach wie vor gross. Die Sommerintensivkurse in Scuol konnten erfolgreich durchgeführt werden. Die Herbstintensivkurse in Sta Maria stehen vor der Tür. Bei Erscheinen dieser ALLEGRA Ausgabe sollte man sich noch über www.curs.ch anmelden können, jedoch wird auch dieses Jahr die Zahl der Teilnehmenden begrenzt werden müssen. Aber auch übers Jahr werden, wieder vor Ort, sowie weiterhin auch online, Abendkurse durchgeführt werden. Weitere Informationen finden Sie auf derselben Seite.
