Per cha’ls uffants pitschens dvaintan fingià fits in rumantsch e douvran la lingua cun gust e plaschair, ha la Lia Rumantscha inizià avant ün pêr ons il program da famiglia kidsfits. Vers la fin da quist on cumparan uossa dafatta duos prodots interessants per famiglias cun uffants pitschens!
Gös auditivs
Duos cudeschs cun insembel vainch istorgias daja fingià da La famiglia Babulin culs uffants Luisa e Nic, la mamma Claudia e’l bap Arno, il chan Lupo ed il giat Brutus – chi ha adüna noscha glüna! Istorgias divertentas cur cha bap o mamma tillas prelegian, ma eir almain uschè da rier schi’s taidla il disc cumpact aint il cudesch. Daspera daja il cudesch dad amias ed amis. Diversas istorgias dals Babulins ha RTR animà e daspö l’on passà daja eir ün quartet per uschè trenar vallader giovond a chartas. Sperapro segns da cudesch, üna mantunada material online chi’s po s-chargiar gratuitamaing e sets da maisa per pitturar in divers restorants in tuot la regiun. Sülla pagina-web kidsfits.ch chattais per exaimpel eir ordinaturs tematics davart trafic, il corp o las culurs. I dà perfin ün ordinatur pel temp dal Niculaus.
E bainbod cumparan apunta novischmas istorgias da La famiglia Babulin – quista jada sco gö auditiv! Sco fat aposta per cur cha las nots vegnan plü lungas, schi va vers Advent e Nadal.
Cudesch da prüma lectüra
Plü gronds cha’ls uffants sun e daplü chi lessan leger svess. E per cha nossa bilinguità dvainta bilingua, douvra natüralmaing cudeschs per rumantsch!
Quist mais po la Lia Rumantscha preschantar Nele ha ün giavüsch – adattà per uffants a partir da 7 ons. Implü chattais sün la pagina-web da la Lia Rumantscha eir üna gronda schelta dad ulteriurs cudeschs valladers.
So werden Kids in romanisch fit
“Kidsfits” ist das Familienprogramm der Lia Rumantscha für Kinder im Vorschulalter und deren Eltern. Mit diesem Programm sollen aber auch Krippen und Kindergärten zusätzliches didaktisches Material erhalten. Ende November erscheinen die Abenteuer der Familie Babulin erstmals als Hörspiel. Zudem kann die Lia Rumantscha bald ein Erstlesebuch für Kinder ab 7 Jahren präsentieren.
Auf der Homepage kidsfits.ch hat es zudem erstaunlich viel Material in Vallader für jüngere auch und ältere Kinder, das man gratis herunterladen kann. Zum Lesen, Hören und auch Schauen. Auch ein Besuch in einer der Buchhandlungen der Region oder im Onlineshop der Lia Rumantscha lohnt sich!
Linard Martinelli, promotur regiunal da la Lia Rumantscha
