Il Chalender Ladin es la publicaziun ufficiala da l’Uniun dals Grischs (verer chaistina). Ella cumpara daspö il 1911 e bleras auturas ed autuors da renom han publichà i’ldecuors dal temp texts in vallader e puter i’l Chalender Ladin, per exaimpel Men Rauch, Giovannes Mathis, Oscar Peer o Rut Plouda. L’almanac es gnü s-chaffi dal poet e politiker da lingua Peider Lansel e’l ravarenda Otto Gaudenz. Quella jada cul suottitel: «Rumauntschs vulains rester». I’l Chalender Ladin tratta da tuottas sorts temas e spordscha üna plattafuorma per differentas fuormas da text, da la poesia a la prosa fin a proverbis.
Cumgià e bivgnaint
Daspö set ons es la redactura respunsabla Bettina Vital Mani, oriunda dad Ardez. Per ella es l’ediziun actuala l’ultima publicaziun. Ella surdà il timun ad Uorschla Natalia Caprez Brühlhart da Ftan. Eir Jon Duri Gross sco cumpositur e grafiker dal Chalender Ladin finischa sia lavur davo 18 ons e va in pensiun. La suprastanza es in tschercha d’üna successiun. «Bettina e Jon Duri han fat üna stupenda lavur e pisserà minch’on per publicaziuns da bellezza ed ün cuntgnü rich, ün cordial grazcha fich da nossa vart», scriva la suprastanza.
Art e litteratura
La cuverta dal nouv Chalender Ladin muossa ün’ouvra artistica da Constant Könz. Cun 94 ons vain purtretà l’artist. Il Chalender Ladin es dvantà seis ami e da quell’amicizcha raquinta’l. Eir l’ediziun actuala es tematicamaing fich variada. In differentas rubricas as legia p.ex. da las manieras da fier dal munt Buffalora, dal dialect da Zernez o dal Chalandamarz da Ftan. Uffants preschaintan lur creatività vivüda in scoulina e scoula ed amias ed amis pigliain cumgià da Chasper Buchli, Dora Lardelli, Peider Duri Könz-Mengiardi ed Otmar Derungs. Il chalender annual dà structura e tips per l‘on 2024 e la cronica repassa l‘on scuors. Per sairas fraidas vain racumandada la lectüra da raquints e poesias chi trategner e laschan ponderar. «Il Chalender dà lö a nossas auturas ed auturs», disch Bettina Vital Mani. Ed el es üna lectüra divertenta per üna e scadüna.
Il Chalender Ladin 2024 vain vendü per 18francs dals cuvis. El po eir gnir retrat dal Chesin Manella da la vendita online ed es eir in vendita in diversas butias in Engiadina.
Infuormaziuns: udg.ch
