L’editura: Allegra, char cudesch! I nu s’ha mincha di l’occasiun da discuorrer cun ün cudesch da teis format!
Il cudesch: Ueila, i’m fa grond plaschair dad esser quia.
Co vegnan cudeschs vairamaing sül muond?
Mia naschentscha es ün’istorgia fich interessanta. L’on 2019 n’haja cumanzà a girar tras il cheu da mia autura Katja Frixe. Eu tilla n’ha intimidada uschè lönch, fin ch’ella ha scrit sü mias istorgias. Cur ch’eu sun lura finalmaing sagli our da la maschina da stampar, n’haja tscherchà ün bel löet süllas curunas da las librarias.
Nus discurrin rumantsch insembel – co be mâ es quai gnü a da quella?
Ün bel di n’haja dudi chi detta varsaquantas mattas e mats chi discuorran üna lingua minoritara, ma fich coola. Eu sun stat be subit fö e flomma pel rumantsch – natüralmaing be i’l sen metaforic. Grazcha a la Lia Rumantscha e mia traductura Annetta Janka-Zini saja uossa interagir culs uffants per vallader.
… e hai, surtuot mias schgneccas sun oramai legendarias - las figüras in mias istorgias savessan quintar bellas, specialmaing magister Flurin e magistra Sidonia. Hihi, els crajan amo hoz chi detta spierts in scoula.
Tü cuntegnast quatter istorgias da comic cun nivel creschaint. Che voul quai dir?
Precis, cun meis agüd pon ils uffants imprender a leger vallader. In tuot cumpiglia quatter istorgias sün differents s-chalins da leger. Cun minch’istorgia s’augmaintan la quantità da text ed il grà da difficultà, adüna sustgnü visualmaing da las illustraziuns da Tine Schulz.
Pudessast tü tradir amo ün zich daplü davart teis cuntegn?
Sün 160 paginas quinta da mias aventüras culla classa da Lina, Curdin e lur conscolaras e conscolars. Eu tils n’ha imprais a cugnuoscher il prüm di da scoula. Fingià là sun capitadas bleras robas curiusas. Amo plü bicocca es lura statta la lecziun da musica. Daspö lura crajan ils magisters vi da spierts. Eir noss’excursiun aint il zoo es statta super-caotica. Per exaimpel sun eu gnü involà dad üna schimgia. Meis custabs sun amo adüna tuot tanterglioter pervi dals saltos ch’ella ha fat cun mai. Ma eir eu n’ha fat üna o tschella lumparia. Ma uossa esa temp dad ir inavant – eu sun be brama da pudair far mias falistoccas culs uffants valladers.
Grazcha fich, char cudesch, per quist’ intervista ün païn differenta. Id es stat fich interessant e divertaivel dad imprender a cugnuoscher a tai ün zich meglder!
