Per scripturas e scripturs rumantschs daja bainbod üna sporta cumplessiva per imprender ed approfundir l'art da scriver texts litterars. Fin uossa daja üna tala pussibiltà be in tschellas linguas naziunalas e brich in rumantsch. Üna realità cha la Lia Rumantscha voul müdar cun spordscher in tal cuors a partir da l’on 2025 eir per rumantsch. Il lavuratori «Scriver litterar» es üna sporta da fuormaziun e da perfecziunamaint per auturas ed auturs rumantschs. Ella pussibiltescha a las partecipantas ed als partecipants da chattar e precisar lur agen scriver litterar. La sporta as drizza a persunas rumantschas chi han fingià fat prümas experienzas da scriver texts litterars e chi vöglian approfundir quellas. La fuormaziun es eir adattada per persunas chi scrivan professiunalmaing in oters chomps e lessan sviluppar inavant lur abiltats. Persunas entusiasmadas da la litteratura chi lessan scuvrir vias nouvas cun scriver sun eir bainvgnüdas – independentamaing da l’età, da la fuormaziun e da l'idiom.
Tschinch moduls tematics
Planisats sun tschinch moduls tematics chi dan üna survista da l'uschè nomnà canon litterar rumantsch ed as concentreschan sül manster dal scriver. Davo avair frequentà quista part tematica approfundischan las partecipantas ed ils partecipants cun sustegn da la gruppa e da mentoras o mentors lur progets litterars individuals.
Ils moduls tematics vegnan manats da docentas e docents versats. Il prüm modul «Experimaint» vain concepi da l’autura ed artista Flurina Badel, il modul «Prosa» vain manà da l’autur Leo Tuor, il modul «Scriver texts scenics» da la dramaturga Selina Beghetto insembel cul autur e pedagog da teater Jürg Gautschi, la «Lirica» maina il poet Dumenic Andry ed il modul «Scriver e publichar texts plurilings» l’autur e professer per didactica da plurilinguità integrada a la Scoul’ota da pedagogia dal Grischun, Vincenzo Todisco. Docentas e docents invidats cumpletteschan il team. Il professer per litteratura e cultura rumantscha a l’Università da Turich Rico Valär maina la part dal «Canon rumantsch».
Il lavuratori es gnü concepi da Gianna Olinda Cadonau, respunsabla pella promoziun da cultura da la Lia Rumantscha in collavuraziun cull’autura Flurina Badel. Quista sporta da la Lia Rumantscha vain sustgnüda finanzialmaing e concepziunalmaing da la Fundaziun svizra per la cultura Pro Helvetia.
Survista dals termins
A partir dal settember 2024 as poja s’annunzchar pel lavuratori da quatter semesters chi cumainza in schner 2025, cumpiglia bundant 30 sondas ed ün tschert temp da lavur vi dals progets litterars individuals i’ls ons 2025 e 2026. Las vacanzas da scoula vegnan resguardadas uschè bain sco pussibel. Infuormaziuns davart la sporta as chatta sün liarumantscha.ch. A partir dal settember 2024 vegnan publichats l’andamaint ed ils criteris per l’admissiun al lavuratori ed üna descripziun detagliada dals cuntgnüts dals moduls.
Chi chi voul fingià uossa savair daplü davart la sporta as po drizzar a la Lia Rumantscha.
«Literarisches Schreiben»
Ab Januar 2025 gibt es dieses Angebot auch in der ersten Landessprache. Mit finanzieller und organisatorischer Unterstützung durch die Pro Helvetia führt die Lia Rumantscha dieses Angebot erstmals durch. Angesprochen werden angehende und erfahrene Schreibende, die ihr Handwerk vertiefen und perfektionieren möchten. Aber auch Menschen, die beruflich Texte verfassen. Als Dozent*innen konnte die Lia Rumantscha ausgewiesene Expert*innen ihres Fachs verpflichten. Weitere Informationen unter liarumantscha.ch.
