La prüm’ediziun chi’d es gnüd’oura avant pacas eivnas es la Chasa Paterna, ün cudaschet da format fich pratic, chi cuntegna per gronda part prosa e tanteraint eir poesia. Quist on es la Chasa Paterna cul titel “cafè e culaischem” implida cun texts da Rut Plouda e disegns da tusch da Dumenic Andry. Rut Plouda scriva cun ün fin sentimaint ed üna lingua viva e richa. Ils texts sun üna clav per entrar aint in ün microcosmos dad algordanzas, allegorias, purtrets ed impissamaints filosofics.
Ils purtrets da Dumenic Andry, chi ha eir lectorà ils texts, cumpletteschan ils impissamaints cumanzats. Els rapreschaintan mincha jada precis il minz dal text e dan listess andit da lascher svolar la fantasia.
La seguond’ediziun chi cumpara es il Chalender Ladin 2022. Sülla pagina da titel as vezza ün mat chi sezza sün ün toc lain e para approfundi aint in seis impissamaints. Eir las contribuziuns dal Chalender Ladin dessan manar ils impissamaints dals lecturs e da las lecturas in tuot las direcziuns pussiblas: Giò Genua, ingio cha pastizarias veglias, fundadas da randulins engiadinais, han stuvü serrar. Giò la Bassa, ingio cha’ls Rumantschs sun adüna bainvis. O lura eir in lös in Engiadina ingio chi capitan qua e là eir chosas inaspettadas e müravgliusas. Müravgliusas sun eir las lavurs portretadas da l’artista Nora Engels chi dà vita al lain cun sias sculpturas sco per exaimpel il mat sül lain.
Inavant ha Rico Valär scrit üna recensiun davart la nouva Chasa Paterna e Mario Pult ha creà ingiavineras per testas finas da pitschen e grond.
La redactura Bettina Vital es ida in tschercha dapertuot da bellas fluors e plantas litteraras. Ella ha semnà bain seis üert, til ha chürà cun premura e finalmaing pudü far üna bella racolta da seis “üert ladin”. Il Chalender Ladin preschainta ün stupend bouquet sgiaglià da texts rumantschs.
Finalmaing cumpara punctualmaing pel temp d’Advent il Dun da Nadel. Quist es üna gazettina da Nadal per tuot ils uffants da scoula. Quist on maina il Dun da Nadal a tuot seis lecturs giuvens e vegls sül viadi intuorn il muond. Els pon leger istorgias davart üsanzas forsa fingià cuntschaintas, per exaimpel il di da Lucia in Svezia. O lura pona eir imprender a cugnuoscher tradiziuns da Nadal main cuntschaintas da nos muond, per exaimpel cha la glieud in Venezuela va il plü gugent cun s-charpas cun roudas a la messa da Nadal.
Implü as chatta i’l Dun da Nadal üna pruna ingiavineras ed instrucziuns per zambriar decoraziuns da Nadal. Eir recettas per buns tes, pastinas e tuortas da Nadal nu mancan. Natüralmaing nu mancan neir las chanzuns da Nadal. Tuot ils texts sun gnüts elavurats da persunas d’instrucziun ed eir dad uffants da la scoula da Scuol.
Il temp d’Advent po dimena gnir impli cun istorgias, decoraziuns e buntats da Nadal.
Ils dis dvaintan plü cuorts – üna bun’occasiun per tour per mans üna lectüra rumantscha per passantar üna saira pachifica a chasa sün pultruna.
Tuot las ediziuns pon gnir retrattas pro l’Uniun dals Grischs sün: shop.udg.ch, illa libraria Chesin Manella a Schlarigna o ingio chi vegnan vendüts cudeschs rumantschs in tuot la regiun.
