L’on passà Kino a Fuldera ed i’l Chesin Manella
L’on passà han la Lia Rumantscha e Radio Televisiun Rumantscha pudü realisar fingià d’inviern, sün iniziativa e cun grond sustegn da la biosfera Val Müstair ün davomezdi da kino per uffants jauers i’l Chastè da Cultura a Fuldera. In november da han lura la Lia Rumantscha e l’Uniun dals Grischs trat inavant il char ed organisà ün Kino Babulin per iffaunts puters i’l Chesin Manella, la libraria da l’UdG a Schlarigna. In tuot han in quellas duos occurrenzas giodü bundant tschient uffants e blers genituors ün davomezdi da kino cun sirup, tuorta e natüralmaing popcorn frais-ch.
Quist on Kino a Zernez ed a Schlarigna
Quist on es stat il Kino per uffants valladers a Zernez. La Canorta Dschemberin a Zernez e lur organisaziun da tet Pro Junior Grischun d’eiran per uschè dir nos osp local ed han sustgnü da maniera grondiusa. Passa tschient uffants, genituors e nonas, bazegners nu n’haja vis ningüns, da diversas gruppas da gö e scoulinas d’Engiadina Bassa e fin sülla Plaiv sun stats da la partida als 17 d’avrigl ill’aula da la chasa da scoula a Zernez. Che bella brajada! E che capitarà be, scha in november haja darcheu nom Kino Babulins sü Schlarigna? I sarà darcheu ün davomezdi cun atmosfera da kino e films cuorts per rumantsch, aposta per uffants!
La Lia Rumantscha ha gnü ils ultims ons ün bel success cullas istorgias da la famiglia Babulin. Pür dret davo da Radio Televisiun Rumantscha ha animà ils disegns e miss sün lur pagina-web ils filmins cuorts. RTR ha però eir blers filmins cun temas multifaris. Implü ha eir l’Uniun dals Grischs films animats cuorts rumantschs in lur assortimaint. Ed uschea s’haja eir il material per pudair far kino per uffants per rumantsch.
Per chi detta ün davomezdi interessant han las differentas instituziuns manà gös per giovar, fögls per culurir, bun sirup, tuortas gustusas e popcorn frais-ch. Ün bel inscunter per pitschen e grond.
E vus vais manchantà il kino rumantsch in Val Müstair ed in Engiadina Bassa? Scha la Lia Rumantscha chatta darcheu ün osp al lö uschè ingaschà sco a Zernez… chi sa scha nus nu chattain eir la storta pro vus l’on chi vain.
