Chargiats culla chaista pinca da kidsfits e bain preparats per ün’ intera lecziun s’ha il team dals promoturs illas regiuns miss in viadi per las visitas in scoula. In avuost 2024 ha tuot la magistraglia, chi instruischa üna prüm’ o seguonda classa rumantscha, retschevü ün invid da la Lia Rumantscha per quista lecziun. Quai cun las finamiras da mantgnair ils contacts locals cullas magistras e magisters, da preschantar nossas sportas e per sensibilisar ils uffants per la situaziun unica e speciala da nus Rumantschs.
Ils rebombs sün nossa sporta d’eiran grondius e fich allegraivels, uschea cha la Lia ha das-chü visitar 37 da totalmaing 38 scoulas rumantschas i’l chantun Grischun.
L’access pro’ls uffants fan las promoturas ed ils promoturs regiunals cun raquintar l’istorgia da Nele. La matta - chi’d es ill’età dals uffants illas classas visitadas - ha bainbod anniversari ed as giavüscha üna bes-cha da chasa tuot speciala per quist di: ün chucalin da mar. Ils genituors nu sun però inchantats e brichafat perinclets cun quist giavüsch. Nele ha plüssas ideas per provar da persvader als genituors. Ils uffants vegnan animats da’s partecipar al raquint cun ordinar ils purtrets dal cudesch tenor la successiun da l’istorgia.
«Che mâ sarà be aint in quel grond paket cun quella bellischma mascha blaua?» as dumondan tuots e s’allegran da tschüffer a la fin da la lecziun pro classa ün exemplar dal cudesch sco regal.
Davo quist barat han ils uffants temp per far divers posts individuals our dal program da kidsfits. Quels varieschan da l’instrucziun da matematica fin pro’ls roms figürativs. Fingià pro las prümas visitas illas classas s’haja demuossà cha duos figüras sun zuond popularas pro las scolaras ed ils scolars rumantschs: Brutus e Lupo! Uschè chi dà illas chasadas rumantschas uossa sgüra ün o tschel nouv set da maisa o segn da cudeschs cun sü ils duos stars da la famiglia Babulin.
A la fin da la lecziun survegnan tuot las scolaras ed ils scolars amo ün pitschen regal sco ingrazchamaint per lur partecipaziun ingaschada. Nempe ün cool sach da gimnastica cul logo da las ediziuns rumantschas, chi stess funcziunar sco segn distinctiv tanter ils uffants da la Rumantschia.
Nus promoturas e promoturs ingrazchain fich pels buns barats ed il grond interess davart da la magistraglia e sperain cha tuot ils uffants portan davo nossa visita cun superbgia lur mantel rumantsch in fuorma dad üna buscha da stoffa.
Tuot il material dal program da famiglia kidsfits sco eir il cudesch «Nele ha ün giavüsch» as chatta in tuot ils idioms in nossa butia sülla pagina dad internet: liarumantscha.ch
